২০২৬ চনৰ টি-২০ বিশ্বকাপক লৈ এক গুৰুত্বপূৰ্ণ সিদ্ধান্ত গ্ৰহণ কৰিছে বাংলাদেশ ক্ৰিকেট ব’ৰ্ডে (BCB)। মুস্তাফিজৰ ৰহমানক আই পি এল ৰ পৰা বাহিৰ কৰাৰ পিছতেই নিৰাপত্তাজনিত কাৰণৰ উদ্ধৃতি দি বাংলাদেশে এই বিশ্বকাপৰ বাবে ভাৰতলৈ নিজৰ ক্ৰিকেট দল প্ৰেৰণ নকৰাৰ সিদ্ধান্ত লোৱা বুলি নিশ্চিত কৰিছে। এই সিদ্ধান্তই আন্তঃৰাষ্ট্ৰীয় ক্ৰিকেট মহলত ব্যাপক চৰ্চা সৃষ্টি কৰিছে।দেওবাৰে অনুষ্ঠিত ১৭ গৰাকী ব’ৰ্ডৰ সঞ্চালকৰ বৈঠকৰ অন্তত এই সিদ্ধান্ত গ্ৰহণ কৰা হয়। বৈঠকৰ পাছত বাংলাদেশ ক্ৰিকেট ব’ৰ্ডে আন্তঃৰাষ্ট্ৰীয় ক্ৰিকেট পৰিষদ (ICC)লৈ এখন আনুষ্ঠানিক পত্ৰ প্ৰেৰণ কৰা বুলি জনোৱা হৈছে। সেই পত্ৰত ভাৰতত অনুষ্ঠিত হ’বলগীয়া বাংলাদেশৰ মেচসমূহ অন্য দেশলৈ স্থানান্তৰিত কৰাৰ অনুৰোধ জনোৱা হৈছে। বিচিবি ৰ সঞ্চালক খালেদ মাছুদ পাইলটে এই সন্দৰ্ভত কয় যে, “আমি আইচিচিলৈ এখন পত্ৰ প্ৰেৰণ কৰি আমাৰ মেচসমূহ ভাৰতৰ পৰা শ্ৰীলংকালৈ স্থানান্তৰিত কৰিবলৈ অনুৰোধ জনাইছো। যদি আইচিচিয়ে আমাৰ কোনো এজন খেলুৱৈৰো নিৰাপত্তা নিশ্চিত কৰিব নোৱাৰে, তেন্তে সমগ্ৰ দলটোৰ বাবে নিৰাপত্তা কেনেদৰে নিশ্চিত কৰিব পাৰে? এই কাৰণতেই আমি ভাৰতলৈ খেলিবলৈ নাযোৱাৰ সিদ্ধান্ত লৈছো।”উল্লেখযোগ্য যে, বিশ্বকাপৰ সূচী অনুসৰি বাংলাদেশ ক্ৰিকেট দলে ভাৰতত মুঠ চাৰিখন মেচ খেলাৰ কথা আছিল। ইয়াৰে তিনিখন মেচ কলকাতাত আৰু এখন মুম্বাইত অনুষ্ঠিত হোৱাৰ কথা আছিল। কিন্তু বৰ্তমান এই মেচসমূহৰ ভৱিষ্যৎ সন্দৰ্ভত অনিশ্চয়তা দেখা দিছে।এই সিদ্ধান্তৰ পাছত এতিয়া আইচিচিৰ ভূমিকালৈ সকলোৰে দৃষ্টি নিবদ্ধ হৈছে। আইচিচিয়ে বাংলাদেশ ক্ৰিকেট ব’ৰ্ডৰ অনুৰোধ গ্ৰহণ কৰি মেচসমূহ স্থানান্তৰ কৰিব নে নাই, সেয়া আগন্তুক দিনত স্পষ্ট হ’ব। লগতে, এই ঘটনাই ২০২৬ টি-২০ বিশ্বকাপৰ আয়োজন ব্যৱস্থাক লৈ নতুন প্ৰশ্ন উত্থাপন কৰিছে।